Aray Tu to Paison Waali Hai!

Ye unn ko jub pata challa to baysharam se ho gaye
'Jaanay na paye haath se', iss darr se 'tere ho gaye'
Aur duur se ab chal diye, jo paas hi mein rehte thay,
Woh jo paresha'n si shakal, aur haath mein ik phone liye,
Jo jaeb se nikaal ker, sarrak kay paar,
Ankhon hi ankhon mein, taaziyyat na kernay kay,
Bahaanay laakh soch ker,
Khaamoshion ki taar per (tujhe) sookhnay ko daal ker,
Sardiyyon mein dhoop ki si aas bun kay,
Ojhal ho jaaya kertay thay.
Woh baysharam se log aaj uth kay jo salam keren
To kyun na ho humein khushi?
Dekh ye karigari:
Ho rahay hain ehtemaam, aur keh rahay hain bar bar:
'Khuda hi ki ye shaan hai, jo shaan hai aaj aap ki!'
Kya aap ko maloom hai woh 'aap' ki ummeed se hai?
Munaafqat ki haamila guzashta naw maheenon se
Kuch aisi taqaaleef mein hai
Kay jinn ka hal hai aap ki tajoriyyon ki wussatein.

Umer Khan